28 05 10 14:32Gåsemyrstøylen 01.06.
Dette er ein av dei lettaste turane i årets program så denne kan alle vere med på.
Køyr til Gåsemyr og ta bomvegen opp til rett før Eggestøylen. Deretter er det slagt innover Øvredalen ein liten time med normal gange på grei rås til Gåsemyrstøylen. Støylen er ikkje stor der den har funne ly bak ein stor stein, - sikkert med god grunn. Tilbake same veg som ein kom.
Atle - Ingen kommentarar
25 05 10 21:19Akkuratoffpiste
Eg noterte meg ordet, men ser at eg slit med tydinga. Det kan difor hende det vart nemnt i ein freistnad på å lage eit nyord, og då let eg heller kommentarspalta vere open for forklaringa. Akkurat er likevel eit dekkande ord for turen. Det slutta å regne akkurat i det vi parkerte, og det etter at vi hadde køyrt akkurat litt lenger enn vi hadde tenkt. Og sola skein til akkurat i det vi sette oss under eit tre ute på Eikenesstøylen. Og som ikkje det var nok, vi rakk nesten til bilane igjen - akkurat før det starta å regne. Det var rett og slett ein fin tur for oss 8 som gjekk. Gåtida vart tilsaman ca 2,5 time, og det var rimeleg vått å gå ut og inn gjennom myrpartia, men veret var altså i godlune akkurat i den tida vi var på veg.Atle - Berre en kommentar
24 05 10 20:16Eikenesstøylen
Det var ikkje antydning til anjegling i komitemøte i vinter. I alle fall ikkje til forslaget om å køyre opp forbi Sandsstøylen, gå ut Hestedalen til Eikenesstøylen, og tilbake. Diskusjon kanskje, men ikkje anjegling. Dette blir ein av dei flataste turane i år, men den er ganske lang. Vi kjenner heller ikkje til korleis det er å gå ytst ute. Men vi kjem oss fram ved å følgje kraftlinjetraseen reknar vi med, om vi ikkje finn ei rås då. Kanskje nokon veit om ei?
Elles har kommentarspalta blitt brukt meir etter det siste innlegget enn gjennom alle innlegga tidlegare. Eg valde bevisst å vere forsiktig med å ordlegge meg, både av omsyn til folk og dyr. Eg lagde også nyordet bevisst, og vi skal ikkje sjå vekk frå at vi får slike også i framtida. Lysketur i fjor og lapratur i år. Og nye kan like godt kome gjennom kommentarspaltene som via rereratet etter turane.
Atle - Ingen kommentarar
18 05 10 22:28Dette var ingen lapratur
Om turen førre veke var DVH, så må dette vere den ultimate eller småekstreme DVH. Eit par av dei 13 som var med hadde vore på Lavesteinen før, medan vi andre var fyrstereisande. Og eg treng vel ikkje fortelje at det er bratt i Hyen, det veit vel alle, men her tykte eg vi fekk høgdemeterane intravenøst. Det var vått og sleipt, men ingen skada seg så at dei vart marodara. Blåmerker og stive musklar er vel ikkje til å unngå.
Dei som måtte lure på det; Lavesteinen ligg høgt over Hope, og den er ikkje spesielt lav i seg sjølv heller. Den ligg fram på kanten og praktisk tala vippar på stupet - du ser han godt nedanfrå vegen. Likevel hadde vi ei som måtte oppå, til liks med at ho måtte krype ned under Svelesteinen for nokre veker sidan.
Vi var heime på skulen att i 11 - tida. Vi hadde ein fin tur denne finverskvelden, og det var også ein svært lageleg temperatur å gå på tur i.
Atle - seks kommentarar
17 05 10 18:2917.mai-komiteen i Bukta
takkar alle,som deltok med underholdning og sitt blotte nærver på nasjonaldagen! Utruleg mange trossa regn og kjøleg luft. I dag var det skikkeleg bunadsveir. Tenk at det ikkje regna frå klokka 15 -18 !! Det var akkurat det vi hadde bruk for. Vi takkar også for kr 2020,- til skulemusikken! Dei fleste oppdaga vel at det hadde sneke seg inn eit par feil på bordkonkurransen. Vi har vel 6 støylar i Mardal Krins,-og Oddbjørn Hjelmeset er fødd i 1971,-sjølv om han var 38 under OL.
Edny - Ingen kommentarar
10:18Tysdagstur i morgon
Marie har fått informasjon om at det kan vere mogleg å legge turen til Lavesteinen. Gådelen av turen startar i Hope i Hyen for dei som er ukjende, og alle som kjenner fjella der inne veit at det heilt sikkert er bratte parti sjølv om vi kan følgje skogsvegen eit godt stykke. Det kan vere litt snø øverst, men vi kan no gå så langt viføler for.
Og elles kan eg no nytte høve til å gratulere alle med dagen i dag.
Atle - Ingen kommentarar
15 05 10 16:3817.mai i Bukta
Toget går frå Solglimt Trykkeri kl.15.00( Oppmøte :14.45.) til tonar frå Sandane Skulekorps. Oppe på skuleplassen vert det barnekor,tale,leikar,natursti og kiosk.VELKOMNE TIL TRADISJONELL FEIRING!
Edny - Ingen kommentarar
11 05 10 21:34Den vesle hardhausen
Ikkje så svært kjent tur, vi veit det, og difor ekslusiv nok til å få ei eiga nemning. Vi var 7 DVH-ar i kveld, alle gjekk opp til Ravnestadstøylen, vidare oppover og utover til Rausetstøylen, og ned att til Ravnestad. Vi spurte oss føre med lokale fjellturistar om råsa utover, men fekk til svar at der har dei no aldri gått, eller at der er det no ikkje vanleg å gå. Takke meg te for det. No må Ravnestadane og Rausetane sjå til å mannje seg opp å gå fram og tilbake mellom støylane slik at det blir eit trakk. Startar dei i måra kan dei bruke spora våre, då er vi komne godt i gong. Ta med dokke litt utstyr til å bane vekk litt småskog berre.
Det var faktisk ein fin tur. Sjølv var eg ikkje sikker på om vi kom til å gå som tenkt, men vi er no nokon stabeisa fleire av oss, og var tilfredse i etterkant. Veret vart også lageleg, litt kaldt er det i desse dagar, og vi fekk nokre snøfluksar på oss, men heilt greitt turver. Vi var tilbake ved skulen kl 10. Ho Liv kan skrive inn i alle fall to timar og 40 minutt effektiv gåtid, og det må no slå bra ut på målestokken.
PS; Kan nokon skrive DVH bak namna våre i Ravnestadstøylsboka ved eit teneleg høve? Vi tenkte ikkje på å gjere det då vi var der. Rausetstøylsboka er oppdatert.
Atle - Ingen kommentarar
10 05 10 11:45Snøen ligg over vår turgrense håpar eg.
Også i lia ovanfor Ravnestad og Rauset sjølv om det låg kvitt i dag tidleg. Nett no sit eg i Førde og har ikkje oversikten over Sørstranda, men er full av håp.
Som de ser av turlista har vi sett opp at vi køyrer ut til Ravnestad, går opp på Ravnestadstøylen, utover lia til Rausetstøylen og ned att. Eg anar ikkje korleis der er å gå, men vi må rekne med at det er delvis vått i terrenget. Og dei som har gått opp støylsråsa til Ramnestadstøylen veit at der er ein del motbakka.
Veret styrer vi også som vi veit, og nemnda har bestemt seg for at det skal bli bra turver denne tysdagskvelden. Det kan bety både snøelingar, nordavind og det som verre er, Turnemnda godtek eit stort spenn i definisjonen av bra turver, men vi får ta det som kjem og legge opp turen etter det.
Atle - Ingen kommentarar
04 05 10 21:13Det vart ein fin kveldstur
det var alle 19 samde om. Vi gjekk den velbrukte råsa innover frå Lotsberg, forbi Ytre Åsane og inn til Indre. Det er rart å tenkje på at den har vore ei viktig ferdaåre for mange opp gjennom tidene, og til alle årstider. Sett frå Anda er det utruleg at der i det heile går ei rås. På Indre Åsane var det framleis sol der vi rasta, og etter ein liten halvtime gjekk vi ut att same vegen, endå meir velbrukt enn den vi såg då vi gjekk innover.Atle - Ingen kommentarar
03 05 10 12:36Tysdagstur til Åsane
Ja, ikkje i Bergen altså, nei det er mykje meir ekslusivt enn som så.
Vi køyrer til Lotsberg og går fjellsida / lia innover til Åsane, og retur. Eg har ikkje gått der før, men har høyrt at det skal vere ein framkomeleg veg å gå. Ikkje særskilt mykje stigning altså, men ha likevel gode sko. Det kan også tenkjast at det er litt vått i terrenget, så ta omsyn til det også. Vi bør ta sikte på kvart på sju ferja, så ver ute i god tid denne kvelden - kvart over 6 kanskje?
Atle - Ingen kommentarar